မကြာမီဖြစ်ပေါ်လာမည့် အစိုးရအသစ်မှ ၀န်ထမ်းများကို အာဆီယံနှုန်းထားနှင့်အညီ လစာများပေးမည်ဟု နေပြည်တော် ၀န်ထမ်း အသိုင်းအ၀ိုင်း များအကြား နှင့် စစ်တပ်အသိုင်းဝိုင်းများမှစုံစမ်းသိရှိရသည်။
အာဆီယံနှုန်းထားအရ အနိမ့်ဆုံးလစာမှာ ကျပ် တသိန်း ဖြစ်ပြီး လက်ထောက် ညွှန်ကြားရေးမှူး တဦး ၏ လစာသည် ကျပ် ခြောက်သိန်း ခန့် ရမည် ဖြစ်ကြောင်း အစိုးရ၀န်ထမ်းအရာရှိတစ်ဦး၏ပြောကြားချက်အရသိရသည်။
ထိုကဲ့သို့ လစာများတိုးပေးနိုင်ရန် ၀န်ကြီးဌာန ၄၀ ခန့်ရှိသည့်အနက် ၁၈ ခုခန့်အထိ လျှော့ချသွားမည်ဖြစ်ပြီး ၀န်ထမ်းအရေအတွက် ကိုလည်း လျှော့ချသွားမည်ဖြစ်ကြောင်း ၄င်းက ဆက်လက်ပြောဆိုသည်။
အစိုးရသစ်အတွက် သမ္မတ အသစ်၏ လစာ သည် ကျပ် သိန်း ၅၀ ရရှိမည်ဖြစ်ပြီး ဒုတိယ သမ္မတမှာ လစာ ကျပ် သိန်း ၄၀၊ ပြည် နယ် လွှတ်တော် အမတ်များမှာမူ လစာ ကျပ် ၂ သိန်း ရရှိမည်ဖြစ်ကြောင်း သတင်းများလည်း ထွက်ပေါ် နေသည်။
အစိုးရ၀န်ထမ်းများ လစာ အဆမတန်တိုးပါက အစိုးရထံမှ ငွေများ ငွေကြေးဈေးကွက်အတွင်းသို့ ၀င်လာပြီး ငွေကြေးဖောင်းပွမှုဖြစ်ကာ ကုန်ဈေးနှုန်း မတည်ငြိမ်မှုဖြစ်နိုင်ကြောင်း စီးပွားရေးပညာရှင် တဦးက ပြောဆိုသည်။
ရန်ကုန်မြို့ရှိ ပုဂ္ဂလိက လုပ်ငန်း ၀န်ထမ်းတဦးက“အစိုးရ၀န်ထမ်းတွေ လစာတိုးရင် ကျနော်တို့ ပုဂ္ဂလိက ၀န်ထမ်းတွေလည်း တိုး သင့် ပါတယ်။ သူတို့ လစာတိုးပြီး ကျနော်တို့မတိုးရင် ကုန်ဈေးနှုန်းကို လိုက်မမီဖြစ်မှာ စိုးရိမ် ပါတယ်”ဟု ပြောသည်။
၂၀၁၀ ပြည့်နှစ် ဇန်န၀ါရီလမှစတင်၍ အစိုးရ ၀န်ကြီး ဌာနများရှိ အောက်ခြေ အဆင့်မှ ညွှန်ချုပ် အဆင့်အထိ ၀န်ထမ်းများကို လ စာ ငွေ ကျပ် ၂၀၀၀၀ စီ တိုးမြှင့်မည် ဖြစ်ကြောင်း သတင်းများ ထွက်ပေါ်ပြီးနောက် ရွှေဈေးနှုန်းမှာ တကျပ်သား လျှင် ကျပ် ၄၀၀၀ ကျော် တက်သွားခဲ့ဖူးကြောင်းသိရသည်။
စစ်အစိုးရက ၂၀၀၆ ခုနှစ် မတ်လ ၂၄ ရက်တွင် ၀န်ထမ်းများ လစာတိုးမြှင့်ခဲ့ပြီး အနိမ့်ဆုံး ၀န်ထမ်းလစာဖြစ်သော ကျပ် ၃၀၀၀ – ၃၅၀၀ ကျပ် ကို ၁၅၀၀၀ -၂၀၀၀၀ အထိလည်းကောင်း၊ ပြန်တမ်းဝင် အရာရှိများ၏ လစာကို အနိမ့်ဆုံး ၈၀၀၀၀ မှစပြီး ၂၀၀၀၀၀ အထိတိုးမြှင့်ခဲ့သည်။ ထိုကာလက စစ်ဗိုလ်၊ စစ်သားများ၏ လစာကိုလည်း အရပ်သားဝန်ထမ်းများထက် အဆများစွာ တိုးပေးခဲ့ သည်။
မြန်မာနိုင်ငံတွင် လွတ်လပ်ရေးရပြီးနောက်ပိုင်း အစိုးရအဆက်ဆက်က ၀န်ထမ်းလစာများ တိုးမြှင့်ခဲ့ရာ ၁၉၄၈ ခုနှစ်တွင်တကြိမ်၊ ၁၉၇၂ ခုနှစ် အောက်တိုဘာလ ၁ ရက်နေ့တွင် တကြိမ်၊ ၁၉၈၉ ခုနှစ် ဧပြီလ ၁ ရက်နေ့တွင်တကြိမ်၊ ၁၉၉၃ ခုနှစ် ဧပြီလ ၁ ရက် နေ့တွင်တကြိမ်၊ ၂၀၀၀ ပြည့်နှစ် ဧပြီလ ၁ ရက်နေ့တွင်တကြိမ်၊ ၂၀၀၆ ခုနှစ် မတ်လ ၂၄ ရက်နေ့တွင်တကြိမ် ၊ ၂၀၁၀ ပြည့်နှစ် ဇန်န၀ါရီလတွင် တကြိမ် တိုးမြှင့်ပေးခဲ့ပြီး စုစုပေါင်း ၇ ကြိမ် ရှိပြီဖြစ်သည်။
www.mandalaygazette.com
No comments:
Post a Comment